Lab se dil ka dil se lab ka rabta koi nahin

lab se dil ka dil se lab ka rabta koi nahin
hasraten hi hasraten hain muddaa koi nahin

harf-e-gham-e-na-paid hai aankhon mein nam napaid hai
dard ka sail-e-rawan hai rasta koi nahin

apne man ka aks hai apni sada ki bazgasht
dost dushman aashna na-ashna koi nahin

sab ke sab apne garebanon mein hain Dube hue
gul se gul tak rishta-e-mauj-e-saba koi nahin

haal-e-zar aisa ki dekhe se taras aane lage
sang-dil itne ki honTon par dua koi nahin

kya koi rakib nahin hum mein samand-e-waqt ka
naqsh-e-pa sab hain to kya zanjir-e-pa koi nahin

main to aaina hun sab ki shakl ka aaina-dar
bazm mein lekin mujhe pahchanta koi nahin

dil ke Dube se miTi dast-e-shanawar ki sakat
mauj ki tughyaniyon se Dubta koi nahin

aankh michoge to kanon se guzar aaega husn
sail ko diwar-o-dar se wasta koi nahin

arsh ki chahat ho ya patal ka shauq-e-safar
ibtida ki der hai phir intiha koi nahin

karwan 'KHurshid' jaane kis gupha mein kho gaya
raushni kaisi ki sahra mein sada koi nahin