Kya hue aashufta-karan kya hue

kya hue aashufta-karan kya hue
yaad-e-yaran yar-e-yaran kya hue

ab to apnon mein se koi bhi nahin
wo pareshan rozgaran kya hue

so raha hai sham hi se shahr-e-dil
shahr ke shab-zinda-daran kya hue

us ki chashm-e-nim-wa se puchhiyo
wo tere mizhgan-shumaran kya hue

ai bahaar-e-intizar-e-fasl-e-gul
wo gareban-tar-taran kya hue

kya hue surat-nigaran KHwab ke
KHwab ke surat-nigaran kya hue

yaad us ki ho gai hai be-aman
yaad ke be-yaadgaran kya hue