kya bad-gumaniyan hain meri jaan lijiye
ye dil to hai wahi ise pahchan lijiye
hum se to ye kabhi nahin hone ka naseho
suniye tumhaari baat ko aur man lijiye
ne aish ki talab hai na ishrat ki aarzu
ai charKH kis liye tera ehsan lijiye
gar hukm ho to kaT ke sar aage la rakhun
lene ka is ke rakhiye na arman lijiye
aaya hun tang shahr mein wahshat ke hath se
ji chahta hai rah-e-bayaban lijiye
gar imtihan-e-ishq ho manzur to abhi
karta hun main niyaz dil o jaan lijiye
munh dekh nau-KHaton ka yahi aae hai KHayal
de kar ke naqd-e-jaan ye quran lijiye
Ghazal
Kya bad-gumaniyan hain meri jaan lijiye
Joshish Azimabadi