kuchh yun bhi mujhe ras hain tanhaiyan apni
rahti hain jilau mein mere parchhaiyan apni
mashhur yahi log kabhi ahl-e-nazar the!
ab DhunDte phirte hain jo binaiyan apni
apna hi sahaara tha sar-e-marka-e-zat
kis kaam ki thin warna saf-araiyan apni
main aur bhare shahr mein is tarah akela!
wo saunp gaya hai mujhe tanhaiyan apni
lau tum ne charaghon ki baDhai to hai 'rashid'
ghere mein na le len tumhein parchhaiyan apni
Ghazal
Kuchh yun bhi mujhe ras hain tanhaiyan apni
Rashid Mufti