kuchh gharaz hum ko nahin hai ki kahan le jae
chal diye bas dil-e-diwana jahan le jae
wo gali KHuld se behtar hai bas itna sun kar
koi waqif ho to hum ko bhi wahan le jae
meri aawaz hui jati hai us ki aawaz
ab hai kya dur ki us tak ye fughan le jae
mauj-e-sarkash ko KHabar-dar kiya tha hum ne
us ko jaana tha jahan ju-e-rawan le jae
gul nahin denge kabhi bulbul-e-muhtaj ko zar
KHwah sarmaya ye sab baad-e-KHizan le jae
ishq mein us ke bas ek jaan hai baqi ye bhi
dekhiye kab ghazab-e-ham-watanan le jae
meri baaten hi KHush aati hain use jaise koi
kar ke aatish nazar-andaz dhuan le jae
Ghazal
Kuchh gharaz hum ko nahin hai ki kahan le jae
Mohammad Aazam