kuchh Dubta ubharta sa rahta hai samne
har lamha ek tilism-e-tamasha hai samne
uDti hai sehn-e-dil mein tahi-manzari ki KHak
rangon ka ek hujum sa bikhra hai samne
bikhri hui hai dhund sar-e-shisha-e-talab
be-rang-o-nur aks-e-tamanna hai samne
zulmat-e-intishaar mein aankhen khuli rakho
tum jis ko DhunDte ho wo duniya hai samne
ek KHauf-e-be-panah hai aankhon ke aar-par
tarikiyon mein Dubta lamha hai samne
hum phir bhi justuju mein bhaTakte hain dar-ba-dar
haalanki har qadam pe wo rahta hai samne
Ghazal
Kuchh Dubta ubharta sa rahta hai samne
Sultan Akhtar