koi ishq mein mujh se afzun na nikla
kabhi samne ho ke majnun na nikla
baDa shor sunte the pahlu mein dil ka
jo chira to ek qatra-e-KHun na nikla
baja kahte aae hain hech us ko shaer
kamar ka koi hum se mazmun na nikla
hua kaun sa roz-e-raushan na kala
kab afsana-e-zulf-e-shabgun na nikla
pahunchta use misra-e-taza-o-tar
qad-e-yar sa sarw-e-mauzun na nikla
raha sal-ha-sal jangal mein 'atish'
mere samne bed-e-majnun na nikla
Ghazal
Koi ishq mein mujhse afzun na nikla
Haidar Ali Aatish