Koi chaara nahin dua ke siwa

koi chaara nahin dua ke siwa
koi sunta nahin KHuda ke siwa

mujh se kya ho saka wafa ke siwa
mujh ko milta bhi kya saza ke siwa

bar-sar-e-sahil murad yahan
koi ubhra hai naKHuda ke siwa

koi bhi to dikhao manzil par
jis ko dekha ho rahnuma ke siwa

dil sabhi kuchh zaban par laya
ek faqat arz-e-muddaa ke siwa

koi raazi na rah saka mujh se
mere allah teri raza ke siwa

but-kade se chale ho kabe ko
kya milega tumhein KHuda ke siwa

doston ke ye muKHlisana tir
kuchh nahin meri hi KHata ke siwa

mehr o mah se buland ho kar bhi
nazar aaya na kuchh KHala ke siwa

ai 'hafiz' aah aah par aaKHir
kya kahen dost wah wa ke siwa