koi bhi shakl mere dil mein utar sakti hai
ek rifaqat mein kahan umr guzar sakti hai
tujh se kuchh aur talluq bhi zaruri hai mera
ye mohabbat to kisi waqt bhi mar sakti hai
meri KHwahish hai ki phulon se tujhe fath karun
warna ye kaam to talwar bhi kar sakti hai
ho agar mauj mein hum jaisa koi andha faqir
ek sikke se bhi taqdir sanwar sakti hai
subh-dam surKH ujala hai khule pani mein
chand ki lash kahin se bhi ubhar sakti hai
Ghazal
Koi bhi shakl mere dil mein utar sakti hai
Azhar Faragh