کتنی مشکل سے غم دوست بیاں ہوتا ہے

کتنی مشکل سے غم دوست بیاں ہوتا ہے
اشک تھمتا ہے نہ آنکھوں سے رواں ہوتا ہے

مطرب وقت کا آہنگ بدل دیتا ہوں
جب ترے عارض و گیسو کا بیاں ہوتا ہے

رنگ و بو بن کے جو اڑتا ہے شبستانوں میں
وہ بھی حسرت کے چراغوں کا دھواں ہوتا ہے

زندگی جبر کے دامن میں جنم لیتی ہے
آدمی دار کے سائے میں جواں ہوتا ہے

ٹھہر جاتا ہوں تہہ زلف نگار فردا
بار امروز جو شانوں پہ گراں ہوتا ہے

زندگی کیا ہے بس اک خانۂ ماتم جاویدؔ
دل دھڑکتا ہے تو احساس فغاں ہوتا ہے