kisi ne kaise KHazane mein rakh liya hai mujhe
uTha ke agle zamane mein rakh liya hai mujhe
wo mujh se apne tahaffuz ki bhik le ke gaya
aur ab usi ne nishane mein rakh liya hai mujhe
main khel haar chuka hun teri sharakat mein
ki tu ne mat ke KHane mein rakh liya hai mujhe
mere wajud ki shayad yahi haqiqat hai
ki us ne apne fasane mein rakh liya hai mujhe
shajar se bichhDa hua barg-e-KHushk hun 'faisal'
hawa ne apne gharane mein rakh liya hai mujhe
Ghazal
Kisi ne kaise KHazane mein rakh liya hai mujhe
Faisal Ajmi