kisi ko chhoD deta hun kisi ke sath chalta hun
main chalta hun to phir wabastagi ke sath chalta hun
sitare banTne wale kisi pal lauT aaenge
chalo kuchh der yunhi tirgi ke sath chalta hun
mujhe ye kya paDi hai kaun mera ham-safar hoga
hawa ke sath gata hun nadi ke sath chalta hun
wo kahte hain zamana tez hai lambi masafat hai
mohabbat ka sitara hun sabhi ke sath chalta hun
badalte mausamon ka KHwab hun kitne zamanon se
yahan main karwan-e-zindagi ke sath chalta hun
manazir rok lete hain mere uThte qadam 'ahmad'
zara sa bhi agar beganagi ke sath chalta hun
Ghazal
Kisi ko chhoD deta hun kisi ke sath chalta hun
Ahmad Rizwan