خواب امید سے سرشار بھی ہو جائے تو کیا

خواب امید سے سرشار بھی ہو جائے تو کیا
دشت تو دشت ہے بازار بھی ہو جائے تو کیا

اب کہاں کوئی ستاروں کو گنا کرتا ہے
میرا ہر زخم نمودار بھی ہو جائے تو کیا

سو چکی شام اندھیرے کا ہے سایہ دل پر
آج خواہش کوئی بیدار بھی ہو جائے تو کیا

زندگی اپنی نہ بدلی ہے نہ بدلے گی کبھی
خاک پا زینت دستار بھی ہو جائے تو کیا

منزلیں بڑھنے لگیں خود ہی مسافر کی طرف
راستہ صورت دیوار بھی ہو جائے تو کیا