خواب دیکھوں کوئی مہتاب لب بام اترے

خواب دیکھوں کوئی مہتاب لب بام اترے
یوں بھی ہو جائے مراد دل ناکام اترے

اگلے وقتوں کی بشارت سے ہو دنیا روشن
آسمانوں سے زمیں پر ترا انعام اترے

یاد آئے تو کھلیں پھول چلے پروائی
درد جاگے تو ترا عکس تہہ جام اترے

میں چراغوں سے ہمیشہ تری بیتی پوچھوں
بن بتائے تو مرے گھر میں سر شام اترے

میں دعا مانگوں کسی نیک گھڑی میں صہباؔ
اس کا دکھ میرا مقدر ہو مرے نام اترے