KHwab aaina kar rahi hai dil mein
jo umr guzar rahi hai dil mein
aahang-e-wajud ban ke har dam
ek mauj-e-digar rahi hai dil mein
har sans dhuan dhuan hai lekin
chandi c nikhar rahi hai dil mein
mahki hui dard ki chameli
kya raushni bhar rahi hai dil mein
basti mein jame rahe andhere
be-tab sahar rahi hai dil mein
rah rah ke visal ki tamanna
kya kya ras bhar rahi hai dil mein
aawara bhi hum hue to 'yusuf'
ek samt-e-safar rahi hai dil mein
Ghazal
KHwab aaina kar rahi hai dil mein
Yusuf Hasan