خلوص عجز و بندگی رہین در نہیں تو کیا

خلوص عجز و بندگی رہین در نہیں تو کیا
حرم سے بے نیاز ہے اگر مری جبیں تو کیا

یہاں تو بوند بوند کو نظر ترس ترس گئی
ملیں اگر بہشت میں شراب و انگبیں تو کیا

نمود زندگی وہی خروش و ہمہمہ وہی
اجڑ گئے مکاں تو کیا بدل گئے مکیں تو کیا

شرر بکف نجوم بھی ردائے گل بھی خونچکاں
نکھر گیا فلک تو کیا سنور گئی زمیں تو کیا

سخن تو من کی موج ہے کہا جو لب پہ آ گیا
زمانہ داد دے نہ دے بشر ہے نکتہ چیں تو کیا