KHud mujh ko mere dast-e-kaman-gir se mila
jo zaKHm bhi mila hai usi tir se mila
tujh ko KHabar bhi hai mere inkar ka jawab
tegh-o-sinan-o-KHanjar-o-shamshir se mila
gum ho gaya tha main usi dasht-e-wajud mein
main apne ism-e-zat ki tasKHir se mila
ai ramz-e-agahi main tujhe KHud pe wa karun
wahshat ko mere paon ki zanjir se mila
milne ki kuchh KHushi na bichhaDne ka KHauf hai
ai meri jaan tu baDi taKHir se mila
dariya tamam tishna-labon ki hai milkiyyat
is mumlikat ko pyas ki jagir se mila
jo KHwab meri chashm-e-zarurat ne kho diya
wo KHwab mere KHwab ki tabir se mila
'shahid' mere mizaj ki aashuftagi na dekh
meri udasiyon ka nasab 'mir' se mila
Ghazal
KHud mujhko mere dast-e-kaman-gir se mila
Shahid Kamal