خود کوئی چاک گریباں ہے رگ جاں کے قریب
اے جنوں حشر کا ساماں ہے رگ جاں کے قریب
منزل دل سے تو گزرے ہوئے دن بیت گئے
کاروان غم جاناں ہے رگ جاں کے قریب
در بدر کس لیے آوارہ ہو سرگشتہ ہو
دوستو کوچۂ جاناں ہے رگ جاں کے قریب
کیا کہیں اب دل بیتاب کا عالم یارو
مضطرب جیسے رگ جاں ہے رگ جاں کے قریب
کیوں نہ کانٹوں کی طرف جائیں ترے دیوانے
خلش جنبش مژگاں ہے رگ جاں کے قریب
شبنم اشک گرا دیتا ہے زخم جاں پر
کوئی ہمدرد سا انساں ہے رگ جاں کے قریب
کس کے گائے ہوئے نغمات سناتا ہوں شمیمؔ
کون ہے وہ جو غزل خواں ہے رگ جاں کے قریب
غزل
خود کوئی چاک گریباں ہے رگ جاں کے قریب
شمیم کرہانی