khile hain phul usi rang ki sataish mein
jo be-misal raha aap apni tabish mein
wo ek din hi meri zindagi ka hasil hai
ki mere pas koi ruk gaya tha barish mein
bas ek jhil hai aur peD ka ghana saya
sulag rahe hain kai log jin ki KHwahish mein
kabhi hua jo kahin par ghazal-sara main bhi
to mere yar jale hain hasad ki aatish mein
main jis ko sochta rahta hun raat-din 'ahmad'
usi ne rang bhare hain meri nigarish mein
Ghazal
Khile hain phul usi rang ki sataish mein
Ateeq Ahmad