KHayal-o-KHwab ki duniya mein la ke dekh liya
teri qasam tujhe tujh se chhupa ke dekh liya
jo ban paDe to zara mere ban ke bhi dekho
ki tum ne mujh ko to apna bana ke dekh liya
kisi tarah bhi wo dil se juda nahin hote
hazar tarah se un ko bhula ke dekh liya
abhi na aae the achchhi tarah se hosh mein hum
kisi ne naz se phir muskura ke dekh liya
jo inqalab na dekha tha hum ne ai 'naKHshab'
wo us nigah ko apna bana ke dekh liya
Ghazal
KHayal-o-KHwab ki duniya mein la ke dekh liya
Nakhshab Jaarchawi