KHat koi pyar bhara likh dena
mashwara likhna dua likh dena
koi diwar-e-shikasta hi sahi
us pe tum nam mera likh dena
kitna sada tha wo imkan ka nasha
ek jhonke ko hawa likh dena
kuchh to aakash mein taswir sa hai
muskura de to KHuda likh dena
barg-e-aKHir ne kaha lahra ke
mujhe mausam ki ana likh dena
hath lahrana hawa mein us ka
aur paigham-e-hina likh dena
sabz ko sabz na likhna 'bani'
fasl likh dena faza likh dena
Ghazal
KHat koi pyar bhara likh dena
Rajinder Manchanda Bani