KHarab-o-KHasta sahi saeban banaya hai
muzaf-e-shahr mein hum ne makan banaya hai
kabhi raha hi nahin mausamon se paiwasta
nae mizaj ka ek gulistan banaya hai
kisi ke waste firdaus hai ye sayyara
hamare waste aazar-e-jaan banaya hai
hudud-e-waqt mein mahdud kar ke insan ko
KHud apne waste kyun la-makan banaya hai
gar iKHtilaf tha 'manzar' to bhi bayan karte
zara si baat ko kyun dastan banaya hai
Ghazal
KHarab-o-KHasta sahi saeban banaya hai
Mohammad Ali Manzar