کر کے آزاد ہر اک شہپر بلبل کترا
آج صیاد نے ایک اور نیا گل کترا
جیب کتروں میں ہے مشہور صبا بادی چور
صبح غنچے کا جو کیسہ بتأمل کترا
دیکھ ٹک اپنے گریبان میں منہ ڈال کے شیخ
حرص کے ہاتھ سے دامان توکل کترا
پنجۂ مہر بنا شانۂ مشاطۂ صبح
مہ جبیں تو نے جوں ہی رشتۂ کاکل کترا
لیں گے مرغان چمن خاک گلستاں کا سبق
باغباں جب کہ خزاں نے ورق گل کترا
کس قدر تیز ہے مقراض سخن تیری نصیرؔ
گوش ہوش و خرد طالب آمل کترا
غزل
کر کے آزاد ہر اک شہپر بلبل کترا
شاہ نصیر