کمر اس دل ربا کی دل ربا ہے

کمر اس دل ربا کی دل ربا ہے
نگہ اس خوش ادا کی خوش ادا ہے

سجن کے حسن کوں ٹک فکر سوں دیکھ
کہ یہ آئینۂ معنی نما ہے

یہ خط ہے جوہر آئینہ راز
اسے مشک ختن کہنا بجا ہے

ہوا معلوم تجھ زلفاں سوں اے شوخ
کہ شاہ حسن پر ظل ہما ہے

نہ ہووے کوہ کن کیوں آ کے عاشق
جو وو شیریں ادا گل گوں قبا ہے

نہ پوچھو آہ و زاری کی حقیقت
عزیزاں عاشقی کا مقتضا ہے

ولیؔ کوں مت ملامت کر اے واعظ
ملامت عاشقوں پر کب روا ہے