Kai shaklon mein KHud ko sochta hai

kai shaklon mein KHud ko sochta hai
samundar paikaron ka silsila hai

badalti rut ka nauha sun raha hai
nadi soi hai jangal jagta hai

bikharne wala KHud manzar-ba-manzar
mujhe kyun zarra zarra joDta hai

suno to phir hawa ka tez jhonka
kise aawaz deta ja raha hai

hawa ka hath thame uD raha hun
hawa fasil hawa hi fasla hai

hudud-e-arz mein gum hone wala
ufuq ko imkan imkan jaanta hai