کہاں فرقت میں ہے دل دار اٹھنا بیٹھنا چلنا

کہاں فرقت میں ہے دل دار اٹھنا بیٹھنا چلنا
تیرے عاشق کو ہے دشوار اٹھنا بیٹھنا چلنا

تمہارا وحشیٔ لاغر نہ ٹھہرا شہر میں دم بھر
پسند آیا سر کہسار اٹھنا بیٹھنا چلنا

فقیرانہ کسی کے زیر سائے ہم بھی رہتے ہیں
ہمیشہ ہے پس دیوار اٹھنا بیٹھنا چلنا

کہیں کیا دوستو اس عشق نے عاجز کیا ہم کو
گراں ہوتا ہے اب ہر بار اٹھنا بیٹھنا چلنا

شباب اس بے خودی میں مشغلہ ہے بس یہی باقی
میان کوچۂ دل دار اٹھنا بیٹھنا چلنا