کہہ رہی ہے یہ کیا صبا کچھ سوچ

کہہ رہی ہے یہ کیا صبا کچھ سوچ
اے حسیں پیکر جفا کچھ سوچ

چند روزہ بہار پر مت جا
گل کا انجام کیا ہوا کچھ سوچ

یہ حسیں رت یہ چاندنی یہ بہار
ایسے عالم میں تو نہ جا کچھ سوچ

کیا ہوئے رہروان منزل شوق
کیوں ہے سنسان راستا کچھ سوچ

خار جس سے لپٹ کے روتے تھے
آبلہ پا وہ کون تھا کچھ سوچ

ہم نہ ہوں گے تو تیری محفل میں
کون ہوگا غزل سرا کچھ سوچ

بپھری لہروں پہ چھوڑ دی کشتی
کیا کیا تو نے نا خدا کچھ سوچ

رہبری کا بھرم نہ کھل جائے
پا شکستوں کے رہنما کچھ سوچ

کس کو چاہے ترے سوا ناصرؔ
کون ہے تجھ سا دوسرا کچھ سوچ