kabhi wo ranj ke sanche mein Dhaal deta hai
kabhi KHushi wo mujhe be-misal deta hai
jawab sochti rahti hun main kai din tak
wo ek sawal hawa mein uchhaal deta hai
hamare pyar sa duniya mein pyar sab ka ho
hamare pyar ki ye jag misal deta hai
kisi ko rang banata hai wo sudama sa
kisi ko daulat-o-jah-o-jalal deta hai
jo mujh se sher ke sanche mein Dhal nahin pata
KHuda kabhi mujhe aisa KHayal deta hai
usi ke hath mein hai karobar duniya ka
kabhi kamal kabhi wo zawal deta hai
wo shaeron ko ata karta hai KHayal nae
musawwiron ko wo kasb-e-kamal deta hai
hai us ka KHas karam mere dil pe ai 'shobha'
wo mere dil ko kasak la-zawal deta hai
Ghazal
Kabhi wo ranj ke sanche mein Dhaal deta hai
Shobha Kukkal