Kabhi un ka nam lena kabhi unki baat karna

kabhi un ka nam lena kabhi un ki baat karna
mera zauq un ki chahat mera shauq un pe marna

wo kisi ki jhil aankhen wo meri junun-mizaji
kabhi Dubna ubhar kar kabhi Dub kar ubharna

tere manchalon ka jag mein ye ajab chalan raha hai
na kisi ki baat sunna, na kisi se baat karna

shab-e-gham na puchh kaise tere mubtala pe guzri
kabhi aah bhar ke girna kabhi gir ke aah bharna

wo teri gali ke tewar, wo nazar nazar pe pahre
wo mera kisi bahane tujhe dekhte guzarna

kahan mere dil ki hasrat, kahan meri na-rasai
kahan tere gesuon ka, tere dosh par bikharna

chale lakh chaal duniya ho zamana lakh dushman
jo teri panah mein ho use kya kisi se Darna

wo karenge na-KHudai to lagegi par kashti
hai 'nasir' warna mushkil, tera par yun utarna