کب تلک ہماری سعیٔ عمل رائیگاں رہے

کب تلک ہماری سعیٔ عمل رائیگاں رہے
کب تک غبار دیدہ و دل رائیگاں رہے

آسودۂ بیاں تو ہزاروں ہیں بزم میں
لیکن وہ بد نصیب جو تشنہ بیاں رہے

ہے اب زبان خلق انہیں کی فسانہ خواں
کل تک ترے عتاب میں جو بے زباں رہے

کیا ذکر عیش رفتۂ عہد بہار کا
غم بھی مجھے قبول ہے گر جاوداں رہے

کیا احتیاط‌ ساغر و مینا کروں کہ جب
بربادیوں میں سازش پیر مغاں رہے

صوفیؔ چمن میں کوشش پیہم کے باوجود
جو پھول نوحہ خواں تھے یوں ہی نوحہ خواں رہے