junun ke josh mein jis ne mohabbat ko hunar jaana
subukdoshi samajhta hai wo is sauda mein sar jaana
kisi ka naz tha andaz tha ab sar-ba-sar jaana
udhar chaDhna nigahon mein idhar dil mein utar jaana
tasawwur KHal-o-ariz ka tamasha-e-do-alam hai
yahan aankhon mein rahna hai wahan dil mein utar jaana
junun-e-ishq mein kab tan-badan ka hosh rahta hai
baDha jab josh-e-sauda hum ne sar ko dard-e-sar jaana
hawas-bazi nahin ye ishq-bazi hai KHuda shahid
mohabbat mein hai shart-e-awwalin ji se guzar jaana
miTai apni hasti hum ne ishq-e-jaan-e-jaanan mein
fana mein dekh kar rang-e-baqa ko mo'tabar jaana
sarapa-e-wafa ek zinda-e-jawed o be-gham hai
takalluf-bartaraf gham kya hai jina aur mar jaana
hamari umr ka paimana ab labrez hai 'sahir'
chhalakna farz ho jata hai paimane ka bhar jaana
Ghazal
Junun ke josh mein jis ne mohabbat ko hunar jaana
Sahir dehlavi