Jo tu nahin to mausam-e-malal bhi na aaega

jo tu nahin to mausam-e-malal bhi na aaega
gae dinon ke baad ahd-e-haal bhi na aaega

meri suKHan-saraiyon ka e'tibar to nahin
jo tu nahin to hijr ka sawal bhi na aaega

agar wo aaj raat hadd-e-iltifat toD de
kabhi phir us se pyar ka KHayal bhi na aaega

shab-e-visal hai bisat-e-hijr hi ulaT gai
to phir kabhi KHayal-e-mah-o-sal bhi na aaega

milega kya tilism-e-zat ka hisar toD kar
ki is ke baad shahr-e-be-misal bhi na aaega