jis ko dekho bewafa hai aainon ke shahr mein
pattharon se wasta hai aainon ke shahr mein
roz harf-e-arzu par TuTte rahte hain dil
roz arz-e-muddaa hai aainon ke shahr mein
qahqahe lagte hain aawaz-e-shikast-e-dil ke sath
kab koi dard-ashna hai aainon ke shahr mein
husn walo kis liye 'ejaz' se ye ijtinab
ek wahi tu parsa hai aainon ke shahr mein
Ghazal
Jis ko dekho bewafa hai aainon ke shahr mein
Ejaz Warsi