جس دم یہ سنا ہے صبح وطن محبوس فضائے زنداں میں

جس دم یہ سنا ہے صبح وطن محبوس فضائے زنداں میں
جیسے کہ صبا اے ہم قفسو بیتاب ہم آئے زنداں میں

ہو تیغ اثر زنجیر قدم پھر بھی ہیں نقیب منزل ہم
زخموں سے چراغ راہ گزر بیٹھے ہیں جلائے زنداں میں

صدچاک قبائے امن و سکوں عریاں ہے اہنسائی کا جنوں
کچھ خوں سے شہیدوں نے اپنے وہ گل ہیں کھلائے زنداں میں

یہ جبر سیاست یہ انساں مظلوم آہیں مجبور فغاں
زخموں کی مہک داغوں کا دھواں مت پوچھ فضائے زنداں میں

غیروں کی خلش اپنوں کی لگن سوز غم جاناں درد وطن
کیا کہیے کہ ہم ہیں کس کس کو سینے سے لگائے زنداں میں

گل بنتی ہے شاید خاک وطن شاید کہ سفر کرتی ہے خزاں
خوشبوئے بہاراں ملتی ہے کچھ دن سے ہوائے زنداں میں

مجرم تھے جو ہم سو قید ہوئے صیاد مگر اب یہ تو بتا
ہر وقت یہ کس کو ڈھونڈتے ہیں دیوار کے سائے زنداں میں

جسموں پہ یہ کس کا نام سیہ لکھ دیتے ہیں کوڑوں کے نشاں
ہیں تاک میں کس کی زنجیریں اب آنکھ لگائے زنداں میں

رفتار زمانہ لے جن کی گاتی ہے گل نغمہ جن کا
ہم گاتے ہیں ان آوازوں سے آواز ملائے زنداں میں