جذب ہے خامشئ گل میں تکلم تیرا

جذب ہے خامشئ گل میں تکلم تیرا
جاوداں میرے چمن میں ہے تبسم تیرا

باغ میں سیل نمو خیز کی ہلچل تیری
دشت میں شور سپاہ مہ و انجم تیرا

تیری مرہون نوازش مری سرشاری خاک
مے کدہ تیرا مئے ناب تری خم تیرا

خشک و تر پست و بلند آئینہ شام و سحر
مہرباں سب پہ ہے سیلاب ترحم تیرا

سب ترے زیر نگیں موج سمندر ساحل
بادباں تیرا تری ناؤ تلاطم تیرا

چشمۂ آب رواں ہے جو سراب جاں میں
اس کی ہر لہر میں رقصاں ہے ترنم تیرا

ہے تری مٹی کے ہر ذرے پہ احساں جس کا
عشرتؔ اس ذات میں ہر نقش ہوا گم تیرا