Jahan-e-dil mein hue inqalab aur hi kuchh

jahan-e-dil mein hue inqalab aur hi kuchh
meri nigah ne dekhe the KHwab aur hi kuchh

mile hain talib-e-ifa ko kuchh nae wade
sawal aur hi kuchh tha jawab aur hi kuchh

Dara na nar-e-jahannam se mujh ko ai waiz
mere janam mein likhe hain azab aur hi kuchh

saja ke lae the kuchh log nama-e-amal
miyan-e-hashr hua ehtisab aur hi kuchh

meri nigah ko ek umr mein mila ye bhed
ki husn aur hi kuchh hai shabab aur hi kuchh

hua hai sail-e-subuk-pa fishaar-e-baad se gum
ye aaya marhala-e-inqilab aur hi kuchh

nahin hain sath pe zahir abhi nishan jis ke
butun-e-geti mein hai pech-o-tab aur hi kuchh