jab tak mujhe nasib teri dosti rahi
har jada-e-hayat mein ek dilkashi rahi
dil mein tere KHayal ki tabaniyon ke sath
dard-e-shab-e-firaq ki bhi tirgi rahi
yun to har ek ghamza-o-ishwa tha dil-fareb
lekin wo ek nigah jo dil par jami rahi
phir is ke baad ho gai tarik rah-e-zist
jab tak tumhaara sath raha raushni rahi
saqi teri nawazish-e-paiham ke bawajud
mahsus ye hua ki abhi tishnagi rahi
tum kya gae ki zindagi be-kaif ho gai
jab tak ki tum qarib rahe be-KHudi rahi
tha ek hujum-e-yas jo baDhta gaya 'nadim'
mahrum-e-imbisat meri zindagi rahi
Ghazal
Jab tak mujhe nasib teri dosti rahi
Raj Kumar Soori Nadeem