Jaane kis chah ke kis pyar ke gun gate ho

jaane kis chah ke kis pyar ke gun gate ho
raat din kaun se dildar ke gun gate ho

ye to dekho ki tumhein luT liya hai us ne
ek tabassum pe KHaridar ke gun gate ho

apni tanhai pe nazan ho mere sada-mizaj
apne sune dar o diwar ke gun gate ho

apne hi zehn ki taKHliq pe itne sarshaar
apne afsanwi kirdar ke gun gate ho

aur logon ke bhi ghar hote hain ghar wale bhi
sirf apne dar o diwar ke gun gate ho