جام تو جام مئے ہوش ربا بھی بدلی

جام تو جام مئے ہوش ربا بھی بدلی
ساتھ ہی رندوں کے پینے کی ادا بھی بدلی

فصل گل بدلی صبا بدلی فضا بھی بدلی
آپ بدلے تو گلستاں کی ہوا بھی بدلی

ٹوٹ جائے گا یقیناً دل مے خوار اگر
نگۂ ساقئ‌ میخانہ ذرا بھی بدلی

بزم یاراں میں صدا سے مجھے پہچانتا کون
میرے حالات جو بدلے تو صدا بھی بدلی

آج تک اس نے تو وعدہ کوئی ایفا نہ کیا
جانے کیا سوچ کے پھر شرط وفا بھی بدلی

ہونے لگتا ہے کچھ احساس شکست توبہ
بادہ خانے پہ اگر چھائی ذرا بھی بدلی

وقت کے ساتھ بدل جاتی ہے ہر شے عاجزؔ
آپ تو بدلے مگر خوئے جفا بھی بدلی