Jal ragon ka gunj lahu ki sans ke tewar bhul gae

jal ragon ka gunj lahu ki sans ke tewar bhul gae
kitni fanaen kitni baqaen apne andar bhul gae

janam janam tak qaid raha ek be-mani angDai mein
main hun wo mehrab jise mere hi patthar bhul gae

jaane kya kya git sunae gardish ki sargoshi ne
be-chehra sayyare mujh mein apna mehwar bhul gae

biti hui sadiyon ka tamasha aane wale kal ka bhanwar
aate jate lamhe mujh mein apna paikar bhul gae

ab bhi chaaron samt hamare duniyaen harakat mein hain
hum bhi be-dhyani mein kya kya jism ke bahar bhul gae

dur kinaron ki reton par khoj rahe hain aaj 'riyaz'
kis ki suni aankhon mein hum apne samundar bhul gae