ishq mein KHud-sari nahin hoti
husn mein bandagi nahin hoti
nawak-afgan bata to de aaKHir
dard mein kyun kami nahin hoti
raaz-e-ulfat kahan chhupaen hum
dil se bhi dushmani nahin hoti
wo mohabbat bhi kya mohabbat hai
jis mein diwangi nahin hoti
aah kar ke bhi hum ne dekh liya
soz-e-gham mein kami nahin hoti
mast aankhon hi se pila saqi
jam se be-KHudi nahin hoti
jab kabhi samne wo aate hain
hum se ek baat bhi nahin hoti
kya karen aise gham ko hum le kar
jis mein un ki KHushi nahin hoti
kaisi taqdir hai hamari 'waqar'
gham hi gham hain KHushi nahin hoti
Ghazal
Ishq mein KHud-sari nahin hoti
Waqar Bijnori