Ishq-e-butan ka jab se mujhe Dhang aa gaya

ishq-e-butan ka jab se mujhe Dhang aa gaya
hathon se mere dast-e-junun tang aa gaya

kis shauq se ye bazm mein kahta hai dil mera
mutrib ke sath ban ke yahan chang aa gaya

Darna abas hai KHar-e-mughilan se ab mujhe
manzil mein ishq ke kai farsang aa gaya

ji chahta hai phenk dun pahlu se main use
betabiyon se dil ki to main tang aa gaya

manzur shisha-e-dil-e-ashiq hai toDna
jo hath mein liye hue wo sang aa gaya

pamal tum ne gar dil-e-ashiq nahin kiya
talwon mein kyun na KHun ka phir rang aa gaya

kis tarah log ku-e-butan tak chale gae
mere to har qadam pe wahan sang aa gaya

sun kar ghazal ko meri 'jamila' ne ye kaha
is mein to sufiyana bhi kuchh rang aa gaya