in talKH aansuon ko na yun munh bana ke pi
ye mai hai KHud-kashid ise muskura ke pi
utrenge kis ke halq se ye dil-KHarash ghunT
kis ko payam dun ki mere sath aa ke pi
mashrub-e-jam hi talKHi-e-gham ka ilaj hai
shirini-e-kalam zara si mila ke pi
waiz ki ab na man agar jaan hai aziz
is daur mein ye chiz ba-taur ek dawa ke pi
bhar le piyala KHum-kada-e-zist se 'hafiz'
KHun-e-jigar hai samne chal kar KHuda ke pi
Ghazal
In talKH aansuon ko na yun munh bana ke pi
Hafeez Jalandhari