اک یادگار چاہیے کوئی نشاں رہے

اک یادگار چاہیے کوئی نشاں رہے
تربت مری رہے نہ رہے آسماں رہے

کیوں دود آہ نیم شبی رائیگاں رہے
اک اور آسماں نہ تا آسماں رہے

کوسوں نشان منزل الفت نکل گئے
ہم محو نغمۂ جرس کارواں رہے

دل انتہا پسند ہے شوق جفا نہیں
وہ مہرباں رہے تو بہت مہرباں رہے

جور و جفائے‌ دور فلک ہیں بقدر عشق
اب جس قدر کسی پہ کوئی مہرباں رہے

المختصر حیات تڑپنے کا نام ہے
پہلو میں دل رہے کہ خیال بتاں رہے

سوز فغاں نے آہ قفس بھی جلا دیا
اب عادئ قیود بتاؤ کہاں رہے

رنگینیٔ جمال فریب خیال ہے
طالبؔ وگرنہ دل میں تمنا کہاں رہے