ek KHalish ek karb pinhan meri KHakistar mein hai
mera dushman hadisa ye hai ki mere ghar mein hai
kaun kis ke ashk ponchhe kaun kis ka dukh baTae
jo hai wo mahrumiyon ke gumbad-e-be-dar mein hai
zarb-e-tesha chahiye aur dast-e-azar chahiye
ek jahan-e-KHal-o-KHad KHwabida har patthar mein hai
is zamane mein meri sada-dili mera KHulus
ek manzar hai magar be-rabt pas-manzar mein hai
bech di 'KHawar' yahan yaron ne namus-e-wafa
tu bhi pyare kis bhulawe mein hai kis chakkar mein hai
Ghazal
Ek KHalish ek karb pinhan meri KHakistar mein hai
Khawar Rizvi