اک ہوا اٹھے گی سارے بال و پر لے جائے گی

اک ہوا اٹھے گی سارے بال و پر لے جائے گی
یہ نئی رت اب کے سب کچھ لوٹ کر لے جائے گی

ایک خدشہ پہلے دروازے سے اپنے ساتھ ہے
راستوں کی دل کشی خوئے سفر لے جائے گی

ایک چوراہے پہ لا کر چھپ گیا ہے آفتاب
کوئی آوارہ کرن اب در بدر لے جائے گی

اک توقع لے کے ٹکرایا ہوں ہر رہرو کے ساتھ
کوئی جھنجھلائی ہوئی ٹھوکر تو گھر لے جائے گی

دل کے کالے غار میں سانسوں کے پتھر جب گرے
ایک ساعت کی چمک صدیوں کے ڈر لے جائے گی

فکر کو سجادؔ پہنائے پسندیدہ لباس
یہ نہیں سوچا کہ وہ گہرا اثر لے جائے گی