ek dil mein tha ek samne dariya use kahna
mumkin tha kahan par utarna use kahna
hijran ke samundar mein hayula tha kisi ka
imkan ke bhanwar se koi ubhra use kahna
ek harf ki kirchi mere sine mein chhupi thi
pahron tha koi TuT ke roya use kahna
muddat hui KHurshid gahan se nahin nikla
aisa kahin tara koi TuTa use kahna
jati thi koi rah akeli kisi jaanib
tanha tha safar mein koi saya use kahna
har zaKHm mein dhaDkan ki sada gunj rahi thi
ek hashr ka tha shor-sharaba use kahna
Ghazal
Ek dil mein tha ek samne dariya use kahna
Yasmeen Habeeb