Idhar mai-kada hai udhar but-kada hai

idhar mai-kada hai udhar but-kada hai
idhar mera saqi udhar dilruba hai

idhar hai meri tishnagi ka mudawa
udhar mere dard-e-jigar ki dawa hai

idhar josh-e-sahba udhar josh-e-ulfat
idhar ibtida hai udhar intiha hai

idhar duKHtar-e-raz ki hai kafir jawani
udhar husn-e-mahbub-e-sidq-o-safa hai

idhar mai pila kar girane ka shewa
udhar tham lene ko dast-e-wafa hai

idhar jaun ya main udhar jaun 'pankaj'
idhar bhi KHuda hai udhar bhi KHuda hai