husn-e-bazm-e-misal mein kya hai
aaine ke KHayal mein kya hai
dekhti kya hai ai nigah-e-karam
mere dast-e-sawal mein kya hai
tu nahin hai to kaun hai mujh mein
farq hijr o visal mein kya hai
inqilabaat-e-zindagi kya hain
gardish-e-mah-o-sal mein kya hai
aap daman-kashan guzarte hain
rahguzar-e-KHayal mein kya hai
baat izhaar-e-haal mein kya thi
raaz iKHfa-e-haal mein kya hai
Ghazal
Husn-e-bazm-e-misal mein kya hai
Rasa Chughtai