حسن اصنام بہ ہر لمحہ فزوں ہے کہ نہیں

حسن اصنام بہ ہر لمحہ فزوں ہے کہ نہیں
یہ مرے ذوق تماشا کا فسوں ہے کہ نہیں

کچھ تو ارشاد ہو اے تمکنت آن جمال
عشق شائستۂ تہذیب جنوں ہے کہ نہیں

یہ جہان مئے و مینا و سبو اے واعظ
پرتو نرگس مستانہ ہے کیوں ہے کہ نہیں

شعلۂ شمع سے خاکستر پروانہ تک
ایک ہی سلسلۂ سوز دروں ہے کہ نہیں

حلقۂ باد صبا تذکرۂ زلف صنم
اس میں کچھ شائبۂ ذوق جنوں ہے کہ نہیں

بستے جاتے ہیں نگر دل ہیں تباہ و ویراں
آگہی دشمن دنیائے سکوں ہے کہ نہیں

ہم وہ ہیں آج روشؔ صاحب دیوان غزل
یہ سب اس چشم سخن گو کا فسوں ہے کہ نہیں